Guddoomiyaha xisbiga mucaaradka Ucid ee maamulka Somaliland Eng. Faysal Cali Waraabe ayaa sheegay in Soomaaliya iyo Somaliland aysan kala maarmeynin, balse loo bahanyahay in talada iyo go’aanka ay ka yimaadaan dadweynaha labada dhinac, gaar ahaan dadweynaha reer Somaliland ayuu sheegay inay yihiin kuwa leh go’aanka ugu dambeeya ee ah inay Soomaaliya mid ahaatabo amaba kala godo.
Faysal Cali Waraabe waxa uu sheegay in dadka siyaasiyiinta ah ee ku sugan deegaanada Somaliland aysan waxba ka bedelin karin mowqifka dadweynaha waqooyi, isla markaasna ay daweynuhu yihiin kuwa iyagu go’aamin kara midnimo Soomaaliya dhexmata ama kala tagto, wuxuuna dhaliil kulul u jeediyey Madaxweynaha maamulka Puntland oo uu ku eedeeyay inuu ka been sheegayo maamulka Somaliland.
“Faroole waxa uu kala qeybinayaa Gaalkacyo oo laba dhinac ah, marka sidee ayuu Somaliland ugu eedayn karaa inay Soomaaliya kala qeybineyso oo aysan ka goi karin, nin hal gobol kala qeybinaya ayaa leh Somaliland Soomaaliya kama goikarto, arrinkaasi waa wax la iska yiri, sida aad la socotaan Faroole waxa uu sheegay in Puntland iyo Somaliland marka hore ay wadahadlaan, isla markaasna aysan goosasho jiri kareyn oo Soomaali aaney kala maarmi kareyn, haddii aysan Soomaaliya kala maarmi kareyn muxuu Gaalkacyo u kala qeybiyey” ayuu yiri Faysal Cali Waraabe.
“Ma ahan dadka Gaalkacyo kala gooyey oo labo u qeybiyey inay Somaliland dhaliilaan oo ay yiraahdaan Soomaaliya kama go’ikaraan, arinkaasina waa iska riyo maalmeed” ayuu yiri Guddoomiye Faysal Cali Waraabe oo rajo wanaagsan ka muujiyey wadahaladii London ku dhexmaray dowladda KMG Soomaaliya iyo maamulka Somaliland oo uu sheegay inay fursad u tahay Somaliland.
↧
Maamulka Somaliland oo ku eedeeyay Madaxweynaha Puntland inuu kala jarayo qaar kamid ah gobolada Soomaaliya
↧